De Zwollenaer
Zoas iedere stad en regio ef Zwolle zien eigen taal. Niet völle mensen in Zwolle kunt echter die Zwolse taal skrieven. Minke Kraijer is ien van de bekendsten die regelmaotig een stukkien in 't Zwols skrieft. Now is ter sinds enige tied ook meer te vinnen angaonde de Zwolse taal. Jacco de Zwollenaer skrieft bi'jnao dagelijks een column in 't Zwols. Niet allenig aover Zwolle of wat ter allemaole gebeurd maer ook aover allerande dagelijkse zaken waor wi'j allemaole met te maken ebt. Op die meniere kump der meer bekendeid aover de skriefwieze van 't Zwols. Der bint ofspraoken aover de skriefwieze die de lèèsbaereid ten goede kump en liekt in eersten instantie of te wieken van 't sprèken. Zo is de meest opvallende wè dät wi'j in ons praoten sprèken aover een briembusse of aover aokn maer wi'j mutten skrieven brievenbusse en aoken. Wè slikken de e' in maer wi'j skrieven em wè. In 't Zwols sprèken en skrieven wi'j gien h', dus dät is läkker makkelijk. As ie meer zol willen lèzen in 't Zwols dan mu-j maer ies zuken naor De Zwollenaer.
